NMC yn cymeradwyo’r cynnydd cyntaf mewn ffïoedd am 11 mlynedd

Oherwydd chwyddiant ers i'r NMC gynyddu'r ffïoedd ddiwethaf, bu colled o 28.8% yng ngwerth gwirioneddol y ffïoedd, gyda cholled o £186m o incwm hyd at ddiwedd mis Mawrth.

O ganlyniad i rewi'r ffïoedd, mae'r rheoleiddiwr wedi gorfod dechrau ariannu ei lwyth gwaith hanfodol ac ehangu trwy dynnu i lawr ar ei gronfeydd wrth gefn - a phostio diffygion sylweddol.

Mae ei gronfeydd wrth gefn wedi gostwng o £101m ym mis Mawrth 2024 i oddeutu £49.6m nawr. Rhagwelir y byddant yn gostwng i £15.9m ym mis Mawrth 2027, os nad yw'r ffïoedd yn cynyddu.

Mae'r Cyngor o'r farn bod y cynnydd arfaethedig i'r brif ffi o £1.92 y mis (cyn rhyddhad treth) yn deg ac yn gymesur – ac yn angenrheidiol er mwyn sicrhau bod yr NMC yn gynaliadwy yn ariannol, ac yn gallu parhau i gyflawni ei waith i ddiogelu'r cyhoedd.

O ganlyniad i'r penderfyniad gan y Cyngor, bydd y brif ffi yn cynyddu £23 y flwyddyn, gan godi o £120 i £143 o 1 Hydref, yn amodol ar gymeradwyaeth y Senedd.

Mewn cyfarfod o'r Cyngor heddiw (28 Ebrill), cytunodd yr aelodau fod y rhewi 11 mlynedd yn y ffïoedd yn fwriad da, i helpu nyrsys a bydwragedd proffesiynol â chostau byw – fodd bynnag, dros y cyfnod hwnnw, mae gwaith diogelwch hanfodol y rheoleiddiwr wedi tyfu'n sylweddol, ac mae'r rhewi wedi dod yn anghynaladwy. 

Roedd y Cyngor yn cydnabod bod llawer o'r ymatebwyr a gymerodd ran yn ymgynghoriad yr NMC ar ei gynlluniau yn glir am y pwysau ariannol parhaus sy'n wynebu nyrsys, bydwragedd a chymdeithion nyrsio heddiw. Fodd bynnag, ni allai chwaith anwybyddu bod y rheoleiddiwr yn postio diffygion sylweddol nawr yn flynyddol

Mae'r NMC bellach yn rheoleiddio 867,935 o weithwyr proffesiynol - tua un o bob 50 o bobl o oedran gweithio yn y DU.

Mae hyn wedi cynyddu'r galw ar holl wasanaethau rheoleiddio'r NMC, gan gynnwys Addasrwydd i Ymarfer, sydd bellach yn trin 21% yn fwy o atgyfeiriadau y flwyddyn - ac yn cynyddu - o'i gymharu â 2015. Dros y cyfnod hwn, mae gwerth termau real y ffïoedd wedi'u rhewi wedi gostwng yn raddol oherwydd chwyddiant.

Mae'r Cyngor yn cydnabod y gofynion cynyddol hyn ar wasanaethau'r NMC ac yn cymeradwyo ymrwymiad y rheoleiddiwr i gyflawni rhagoriaeth weithredol ym mhob maes – o addysg a safonau i gofrestru ac ailddilysu, allgymorth cyflogwyr, diogelu ac Addasrwydd i Ymarfer.

Nododd y Cyngor hefyd, er bod y rhan fwyaf o ymatebwyr i ymgynghoriad yr NMC yn gwrthwynebu cynnydd yn y ffïoedd, eu bod hefyd yn cytuno y dylai'r rheoleiddiwr barhau i fuddsoddi mewn gwelliannau:  

• Gwell sicrwydd ansawdd addysg, gan sicrhau bod gweithwyr proffesiynol newydd wedi’u paratoi yn dda  
• Safonau proffesiynol cryfach a chliriach, sy'n adlewyrchu arfer modern  
• Prosesau Addasrwydd i Ymarfer cyflymach, tecach, gan leihau straen ac oedi  
• Tegwch rheoleiddiol, ymgorffori tegwch, amrywiaeth a chynhwysiant i ddileu rhagfarn
• Gwasanaethau digidol modern, sy’n ei gwneud yn haws i ryngweithio â’r NMC. 

Pe byddai'r ffi wedi cynyddu yn unol â chwyddiant ers 2015, byddai bellach tua £168. 

Dywedodd Ron Barclay-Smith, Cadeirydd: 

"Mae'r Cyngor wedi ystyried yn fanwl yr effaith y bydd y codiadau arfaethedig hyn yn ei chael ar y rhai y mae'n eu rheoleiddio. Roedd y ddadl lawn a chadarn heddiw yn cydnabod y pwysau ariannol sy'n wynebu llawer o nyrsys a bydwragedd proffesiynol. 

"Ar yr un pryd, roedd y Cyngor yn glir yn ei farn bod angen rheoleiddiwr perfformiad uchel ar y proffesiynau a'r cyhoedd. Ar ôl 11 mlynedd o ffïoedd unffurf, mae'n bryd sicrhau dyfodol ariannol cynaliadwy i'r sefydliad. 

"Dydyn ni ddim wedi cymryd y penderfyniad hwn yn ysgafn. Roedd gweithwyr cofrestredig a ymatebodd i'n hymgynghoriad yn glir bod costau byw yn parhau i fod yn broblem wirioneddol, mwy na degawd ar ôl i ni rewi'r ffïoedd cofrestru i geisio lleddfu'r pwysau ariannol hynny.

"Er bod y rhewi yn fwriad da, mae hyn wedi cael effaith ddofn ar ein cyllid, y mae llawer o weithwyr cofrestredig hefyd wedi dweud wrthym eu bod yn ei ddeall.

"Mae cael rheoleiddiwr cryf, annibynnol - un sy'n gallu gweithredu'n gyflym, yn deg ac yn effeithiol i amddiffyn y cyhoedd a chefnogi hyder yn y proffesiynau - yn bwysig. 

"Dyna beth yw'r penderfyniad hwn yn y pen draw. 

"Ymrwymiad y Cyngor yw y bydd yn dal y Weithrediaeth i gyfrif am ddarparu gwell gwerth i weithwyr cofrestredig - gyda safon uwch o reoleiddio sy'n cefnogi gweithwyr proffesiynol ar y gofrestr yn well i gynnal safonau uchel a diogelu'r cyhoedd."

Dywedodd Paul Rees MBE, Prif Weithredwr a Chofrestrydd: 

"Rydym yn adeiladu NMC newydd - y rheoleiddiwr cryf ac annibynnol y mae eisiau ei weld ar bawb. 

"Ond dim ond o sefyllfa ariannol gynaliadwy y gallwn gyflawni hyn i'r proffesiynau a'r cyhoedd. Dyna pam rydym yn cymryd y cam o gynyddu'r ffïoedd cofrestru am y tro cyntaf mewn 11 mlynedd. 

"Rydym yn cydnabod y cyfrifoldeb sy'n dod gyda'r penderfyniad hwn a byddwn yn atebol am ddangos effaith pob punt rydym yn ei gwario.

“Rydym wedi ymrwymo'n llwyr i wario ffi pob gweithiwr cofrestredig yn ddoeth i amddiffyn y cyhoedd ac ysbrydoli hyder yn y proffesiynau nyrsio a bydwreigiaeth. Mae hynny'n golygu darparu gwell sicrwydd ansawdd addysg, safonau proffesiynol cryfach a chliriach, prosesau Addasrwydd i Ymarfer cyflymach a thecach, tegwch rheoleiddiol a gwasanaethau digidol modern. 

"Bob blwyddyn, mae gweithwyr proffesiynol nyrsio a bydwreigiaeth yn gofalu am filiynau o bobl ledled y DU. Y tu ôl i'r gofal hwnnw mae’n rhaid fod rheoleiddiwr sy'n gryf, yn deg ac yn ddibynadwy. Mae'r newid hwn yn sicrhau y gallwn barhau i chwarae'r rôl honno - nid yn unig heddiw, ond ar gyfer y dyfodol”.

Other recent news…